Talo bixin iyo Maansada suxufiyo siyaasoow

Asc wr wb, waxan salamayaa dhamaan bulshada soomaaliyeed meelkastay joogaanba anigoo aan jeclayn in aan ka hadlo arimaha khuseeya siyaasada kana madax banaan dhamaan xusbiyada dalka ka jira kana mid ah dhalinyarada ka shaqeeya ururada wacyigelinta iyo horumarinta arimaha bulshada hadana waxan doonayaa in aan si kooban uga hadlo laba qodob oo soo jeedin iyo dhaliil isugu jira .

Qaybta koobaad waxa y ku saabsantahay suxufiyiinta soo bandhigta waxkasta oo sirta iyo sumcada dalka wax yeelaya iyaga oo aan ka fekerin cadawga umada, caqabadaha iyo cidhib dambeedka ay umaddu ka dhaxli karto arin ay si xun ugu soo gudbiyeen bulshada ku xeeran xiliyada ay jiraan arimo xasaasiya iyo xaalado cusubi sidoo kale siyaasiyiinta hadafkoodu hooseeyo, hankooduna kusoo ururo hunguri, hadal kooduna reer hebel, hogaamintii wacnayd iyo hiyigii laga sugayayna halleeyay higsi fogna lahayn ee ka fikiraaya dano u gaara markaan sidaa leeyahay cid gaara qof iyo qayb kamida toona uma jeedo laakiin waxan sheegayaa cidkasta oo si khaldan wax u sheegta ama u qorta ciduu doona ha ahaado ama qaybtu doono haka tirsanaado. Qaybtan waxan u dhaafayaa tala bixintooda maansada magaceedu yahay HAKU SHIILMIN AAKHIRO ee xaga hoose ku qoran.

Ninka xarafka qora iyo

Suxufiga xorta ahaw

Ninka xeelad sheegtiyo

Xusbi iyo siyaasoow

Mar hadaa xilqaadeen

Umada u xamaashaan

Waa in aad xaq dhawrtaan

Wixii xiisad kicin kara

Amnigana xumayn kara

Shacbiguna xamili Karin

Sharaftana xawili kara

Shaqadana xayiri kara

Shaydaanka xoog tara

Shuf tadana u xiise ah

Cadawgana u shaafiya

Waa in aad shagaashaan

Ilayn shaama reernee

Shir gudoon samaystoo

Waxkastoo shil dhalin kara

Shaashadaa ha keenina

Sha,da kale waxay tahay

Sheeg sheega khayrkoo

Shib ka dhaha xumaantoo

Shar wadeen ha noqonina

Shay kale xasuusoo

Kiinii shax dhigayiyo

Midka been shu shubayee

Buun buunsha hadalada

Rabbi baa u shaahida

Bulshadaa shuhuud u ah

Isagaan ka sheelayn

Shay dunida yaalaa

Sharcigana u soo rogay

Shaan dhaynta aadmaha

Kuu sheegay amarada

Shaydaanku kaa diray

Waxba yaan shubaahine

Ifku waa shan maalmood

Waxa aad shaqaysaad

Shir waynaha la tagaysaa

Haku shiilmin aakhiro

Shay aan ku siiyee

In aad shaakir noqotaan

Rabbigiin shucuurtaan

Shaydaanka naartaan

Shacabkana shifaysaan

Shalawgana dabooshaan

Cadawgana shareertaan

Sharaftiina weeyaan……

Qaybta labaad ee mawduuca waxan u soo jeedinayaa shacabka siyaasada ku milmay ee markasta iyo meelkasta hadal haya in ay iska hubsadaan wararka ay ka maqlaan labada qolo ee aynu xaga sare ku xusnay kana feejignaadaan waxkasta oo nabada iyo xasiloonida dalka dhawici kara laba arina meel mawada galaan doorasho ku salaysan qabiil madax ilaa mijin iyo cadaalad raadin sidaa awgeed marka hore qofkastaa waa in uu qiimayn buuxda ku sameeyo masuulka uu codkiisa siinayo isagoo ka eegaya dhinacyada hogaamiyaha wanaagsan ee horumarka aqoonta iyo awoodiisa wax qabad laakiin hadii aad marka hore qabiil ku dooratay iyo dano gaara hadhawto cidna ha canaanan .

gabogabadii mawduuca dhalinyaradu waa in ay ka fogaadaan in loo adeegsado ujeedooyin gaara oo lagu majara habaabinayo masiirkooda aqooneedna hoos u dhigaya sida in ay cid iska taageeraan ama iska cambaareeyaan iyaga oo aanay hayn wax xaqiiqa oo go,aan lagu qaato ama lagu diido iyadoo hab caadifadeed loogu adeeganayo ama qabiil meelo dhawna wax laga tusayo waayo umadi waxay ku dhisantaa dhigeed ay ku dhaaftaa dhalinyarada weeyaanwaa halku dhigyada dallada SYNA markasta ku baraarujiso dhalinyarada kuna dhiirigeliso waxuuna xambaarsan yahay macno wayn oo wax ku oola.

dhalinyaro waxan idin rajaynayaa in aad yeelataan fikir saliima, faalo saxan,feejignaan iyo firfircooni kana fogaataan caqliyada fadhiidka iyo faasidka ah kuwaas oo ay fadhiisiyeen qabyaalada iyo qudhunka ku xeeran hadii aynu la nimaadno arimahan waxaynu ku gaadhaynaa furayaasha guusha allaa mahad leh.

kaltuun maxamed muuse